بنهاية كل سنة .. منفكر .. منعتقد .. منظن ... انو السنة يلي بعدها رح تكون احلى واجمل واروع ... بس يا ترى هالحلم او هالاعتقاد عم يتحقق .... ما بظن !
نحنا هل على مشارف سنة جديدة .. العالم كلها مطبولة والدنيا برا كلها زيطة وزنبليطة ... كلو بدو يحتفل .. انو شو والله .. صرنا بالـ 2010 .... اي وازا .. ما هيي سنين وعم تمر ... ونحنا .. او انا بالزات مكانك راوح !
جايينا عام جديد ... بس هالمرة وحيد .. بالعادة ممكن تلاقيه بيجي معو شوية بسط ... شوية هموم ... شوية قرف ... شوية سعادة ... هالمرة غير كل مرة ... عندي احساس غريب .. انو هالعام ... جاية وحيد ... بلا ولا شي ... تعى نقعد بالفي .. مش لحدا هالفي ... تيررارا .. !
جاية وحيد ... بلا حب ... بلا رفيق ... بلا امل .. بلا فرح .. بلا خوف ... بلا حزن.. !
بيقولوا المكتوب بيبين من عنوانو ما هيك ... وانا من شوي كنت عم اقرا العنوان ... طلعوا نسيانين يكتبوه .. لهيك جاية هالسنة بالغلط ... !
قال كنت عم بسمع ببرجي يلي هوي الاسد .. انو هي سنتي .. وعندي تغييرات جذرية .. وآمال كبيرة ... ودنية وقصص وهيكة ... هههه ..بزمتي ششي بيضحك ... مننلي التغييرات والآمال ... ازا بالاصل هي الاشيا كنت لازم ابدا فيها من السنة هي يلي مرقنا فيها !
احسن شي الواحد يتركها ع الهلّة ... ويلي بدو يصير يصير ... ما يعطي آمال اكبر منو لأنو رح ينتكس .. فا لزالك ... خلينا هيك ... بلا ولا شي ... بالفي بالشمس ما بتفرق لأنو ع الحالتين الفي والشمس مش لحدا !
كل ما نعطي أمل بـ حب جديد ... بتجي العاصفة وبتروحوا ... كل ما نعطي أمل بـ حياة جديدة ... بيجي انا والبشر ومنخربها ... كل ما نعطي أمل بـ أمل جديد ... انا واليأس وهنن بنحرق أملو للأمل !
2010 .. حابب غنيلك يا عامي الجديد ... أهواك ... بلا أمل .
وعام جديد .. ووحيد وفريد وشديد وعنيد ومديد ... علينا وعليكن ... وبتمنالكن يكون حلو ... بس بدون أمل ها !
* ملاحظة : الصورة ملطوشة .
*ملاحظة رقم تنين : الحكي بالعامّي .. لأنو انا هيك بدي ... !
2010 .. حابب غنيلك يا عامي الجديد ... أهواك ... بلا أمل .
وعام جديد .. ووحيد وفريد وشديد وعنيد ومديد ... علينا وعليكن ... وبتمنالكن يكون حلو ... بس بدون أمل ها !
* ملاحظة : الصورة ملطوشة .
*ملاحظة رقم تنين : الحكي بالعامّي .. لأنو انا هيك بدي ... !
ليست هناك تعليقات:
إرسال تعليق